اللہ تعالیٰ نے دین کی تبلیغ کے لئے روز اوّل سے تعلیم و تربیت کا سلسلہ جاری فرمایا اور اس کے لئے انبیاء و رسل علیہم السلام  کو مبعوث فرمایا اور آسمانی کتب و صحائف کو نازل فرمایا۔ سلسلہ نبوت کی خشتِ اول سیدنا حضرت آدم علیہ السلام ہیں اور یہ سلسلہ امام المرسلین خاتم النبین حضرت محمد مصطفی ﷺکی ذات بابرکات پر مکمل ہوا۔ آپ ﷺکے ظاہری پردہ فرمانے کے بعد یہ ذمہ داری صحابہ کرام رضوان اللہ علیھم اجمعین  نے سرانجام دی اور صحابہ کرام رضوان اللہ علیھم اجمعین  کی تعلیم و تربیت کے لئے آقا کریمﷺنے خود مسجد نبوی میں پہلا مدرسہ صفہ کے نام سے قائم فرمایا جس کی روشن کرنیں چہار دانگِ عالم میں پھیل گئیں۔ برصغیر  میں منبع فیوض و برکات مظہرِالعلومِ الخفیہ و الجلیہ الشیخ علی بن عثمان الہجویری المعروف حضرت داتا گنج بخش رحمۃ اللہ علیہ جیسے  مبلغینِ اسلام کے توسط سے یہ فیضاںِ نبوی  پہنچا۔مسلم سلاطین نے فتوحات کے بعد اپنے ادوار میں حسبِ توفیق دینی تعلیم کی تنظیم و تنسیق میں دلچسپی ظاہر کی۔ ملا نظام الدین  نے سلطان اورنگ زیب عالمگیر کی تجویزپر  اپنے دور کے تقاضوں کے مطابق ایک  نصابِ تعلیم ترتیب دیا جسے تاحال درسِ نظامی کی مروّجہ   اصطلاح سے جانا جاتا ہے۔ابتداءً دہلی اور مختلف سرکاری درس گاہوں میں نافذ کیا گیا۔لیکن  یہ تعلیمی تسلسل فقط دہلی کی درس گاہوں تک ہی محدود نہ رہا بلکہ یہاں کے فضلاء اس علمی فیضان کے ہمراہ خطے کے طول وعرض میں پہنچے۔ دہلی کی سرزمین سے ہی مفتی شمس الدین دہلوی رحمۃ اللہ علیہ کے لختِ جگر مبلغِ اسلام مولوی  فتح دین دہلوی رحمۃ اللہ علیہ نے پاکپتن شریف کے مضافات میں ہجرت کر کے دین متین کی اشاعت کا اہتمام فرمایا۔ یہ علمی فیضان ان کے صاحبزادے صوفی باصفا مولوی احمد دین چشتی رحمۃ اللہ علیہ اوران سے ہوتا ہوا، ان کے صاحبزادے عاشق ِغوث الوریٰ مولانا حاجی محمد یوسف چشتی انتالوی رحمۃ اللہ علیہ کے ذریعے  احمد آباد(چکباوا)حویلی لکھا پہنچا،انہوں  نے  مرکزی جامع مسجد غوثیہ کی بنیاد رکھی اور تاحیات وہیں درس وتدریس اور امامت  کے ذریعے اپنی  خدمات پیش کیں۔میرے جدّ امجد مناظر اسلام استاذالعلماء شیخ الحدیث حضرت علامہ مولانا مفتی محمد علی قادری حریری رضوی رحمۃ اللہ علیہ نے محدثِ اعظم پاکستان استاذالعلماء شیخ الحدیث حضرت علامہ مولانامفتی سرداراحمد قادری رحمۃ اللہ علیہ،لائل پور(فیصل آباد) سےاپنا تعلیمی سفر مکمل کرنے کے بعد سرگودھا،گجرات اورلاہور کے  مختلف علاقوں میں درس وتدریس اور تبلیغِ دین کے فرائض سر انجا م دیے، بالآخر اپنے والدِ گرامی مولانا حاجی محمد یوسف چشتی انتالوی رحمۃ اللہ علیہ کے حکم پر واپس اپنے آبائی علاقےحویلی لکھا کا رخ کیااورجامعہ علویہ و الحسن علویہ اسلامک اکیڈمی کی صورت میں وقیع علمی ادارےکی بنیاد رکھی،جسے آپ کے صاحبزادے  محبوب المشائخ پیکرِاخلاص و محبت حضرت علامہ مولانا الحاج قبلہ قاری محمد حسن قادری نوری علیہ الرحمہ نےانتہائی  جانفشانی اور شب و روز کی انتھک محنت سےآبادکیا۔اورتاحال جانشینِ قبلہ جی سرکارحضرت علامہ صاحبزادہ قاری محمداحمدحسن قادری دامت برکاتہ اس تسلسل کو جاری رکھے ہوئے ہیں۔اس ادارے  سے فیض یافتہ طلبہ وطالبات  نے جہاں کئی اداروں کی داغ بیل ڈالی اورملک کے طول وعرض میں  خدمتِ دینِ متین کے فرائض سرانجام دے رہے ہیں،وہیں دار المعرفۃ انٹرنیشنل اسی مبارک وراثت کو ڈیجیٹل انداز میں آگے بڑھاتے ہوئے وقت کے تقاضوں کے مطابق ایک جدید ترین آن لائن تعلیمی ادارہ ہے۔ جو دنیا بھر کے طلبہ و طالبات کو قرآن و سنت کی روشنی میں دینی اور عصری علوم کی معیاری تعلیم فراہم کررہا ہے۔ ہمارا بنیادی فلسفہ یہ ہے کہ علم صرف معلومات کا مجموعہ نہیں بلکہ دل کو اللہ کی کتاب سے جوڑنے کا ذریعہ ہے، چنانچہ ہمارے کورسز نہ صرف تعلیم دیتے ہیں بلکہ کردار سازی، روحانی پاکیزگی اورعملی زندگی میں قرآنی احکام کو نافذ کرنے کی تربیت بھی دیتے ہیں۔ہمارے ہاں ابتداءً چند شعبہ جات ہیں جن کے تحت کئی کورسز کروائے جاتے ہیں۔ادارہ اپنے انتظامی بورڈ کی سفارشات پر گاہے بگاہے کئی شارٹ کورسز اور فری سیشنز کا اہتمام بھی کرتا رہتا ہے۔عصری علوم کی مارننگ شفٹ میں کلاسز کی وجہ سے درینہ خواہش کے باوجود دینی تعلیم کئی طلبہ وطالبات کا خواب بن کر ہی رہ جاتی تھی ۔اس ضرورت کے پیش ِ نظر سیکنڈ ٹائم  آن لائن کلاسز  کا اہتمام کیا جاتا ہے۔تاکہ طلبہ وطالبات گھر میں بیٹھ کر اپنے موبائل ،ٹیب یا لیپ ٹاپ پرکلاسز لےسکیں۔خصوصاً ان طالبات کے لئے محفوظ ترین طرزِتعلیم ہےجوگھر کی چاردیواری میں رہتے ہوئے تعلیم حاصل کرنا چاہتی ہیں اس طرح وہ بھی اپنے سرپرست کی زیرِ نگرانی گھر میں محفوظ رہتے ہوئے اپنی تعلیم جاری رکھ سکتی ہیں،کیونکہ ہمارے ہاں میل اور فی میل دونوں سٹاف موجود ہیں۔